• Stad skipstunnel er eit svært viktig og høgt prioritert prosjekt for Møre og Romsdal fylke,
både for gods- og persontransport. (illustrasjon: Snøhetta/Kystverket)
Vil ha oppstart av Stad skipstunnel i 2021
– Møre og Romsdal fylkeskommune forventar at Stad skipstunnel får oppstartsløyve neste år,
seier fylkesordførar Tove-Lise Torve (AP) og leiar i samferdselsutvalet Kristin Sørheim (SP).
Publisert: 18.05.20 Oppdatert: 18.05.20 Skriv ut
Torsdag 14. mai behandla fylkesutvalet Møre og Romsdal sine prioriteringar i Nasjonalt transportplan.
– Fylkesutvalet har gitt si innstilling til ny Nasjonal transportplan, og prioriterer oppstart av Stad skipstunnel som det eine, store viktige nvesteringsprosjektet innanfor sjøtransport, seier Torve.
Stad skipstunnel er fullfinansiert i gjeldande NTP, og Stortinget har vedtatt byggestart i inneverande stortingsperiode (2017-2021).
– Fylkesutvalet føreset naturlegvis at Stortinget følger opp dette og gir oppstartsløyving i 2021 og fullfinansiering i påfølgande år. Statsbudsjettet for 2021 er siste sjanse til å innfri dette løftet frå Regjeringa og Stortinget. Verdas første skipstunnel kan då opnast i 2025.
Stad skipstunnel er eit svært viktig og høgt prioritert prosjekt for Møre og Romsdal fylke, både for gods- og persontransport.
– For reiselivet vil tunnelen også bety eit stort løft og opne nye moglegheiter for Vestlandet. Dessutan er det eit viktig prosjekt for trafikktryggleik og beredskap, seier Kristin Sørheim, leiar i samferdselsutvalet.
– Prosjektet vil bidra til sysselsetting og verdiskaping både i byggefasen og etterpå, og er klart til oppstart. Dermed vil det vere særleg godt eigna også som eit motkonjunkturtiltak i to fylke som er hardt ramma av tiltak mot Covid 19, seier Sørheim.
Kontakt
Tove-Lise Torve
Fylkesordførar
Arbeidarpartiet
94 16 51 75
Kristin Marie Sørheim
Leiar samferdselsutvalet
Senterpartiet
95 28 60 60